Թալին համայնքի ղեկավար Տավրոս Սափեյանն ու համայնքապետարանի ղեկավար կազմն այսօր անցկացրին աշխատանքային խորհրդակցություն համայնքի վարչական ղեկավարների հետ:
Խորհրդակցության օրակարգը բազմաբովանդակ էր և ընդգրկում էր համայնքային կյանքի գրեթե բոլոր առանցքային ոլորտները։ Քննարկվեցին հարկերի և տուրքերի հավաքագրման ընթացիկ ցուցանիշները, աղբահանության և արտաքին լուսավորության կազմակերպման արդյունավետությունը, ջրամատակարարման համակարգերի խնդիրներն ու բարելավման ուղիները։ Բացի այդ, առանձին ուշադրության արժանացան համայնքի բնակավայրերում սոցիալական, աշխատանքային, տնտեսական, կոմունալ, ֆինանսական, գյուղատնտեսական և մշակութային բնույթի հրատապ խնդիրները։
Հատուկ ուշադրություն դարձվեց Կառավարության աջակցությամբ Թալին համայնքում կառուցվող մանկապարտեզների և դպրոցների շինարարական աշխատանքներին։ Կարևորվեց կրթական ենթակառուցվածքների բարելավումը և շինարարության ընթացքում իրականացվող հետևողական վերահսկողությունը։
Խորհրդակցության ավարտին Տավրոս Սափեյանը կոնկրետ հանձնարարականներ տվեց, որոնք միտված են օրակարգային հարցերի հասցեական և օպերատիվ լուծմանը՝ համայնքի զարգացման գործընթացն առավել կազմակերպված և արդյունավետ դարձնելու նպատակով։