Այսօր Թալին համայնքի ղեկավար Տավրոս Սափեյանն աշխատանքային խորհրդակցություն անցկացրեց համայնքի վարչական ղեկավարների հետ։ Աշխատանքային խորհրդակցությանը մասնակցեցին համայնքի ղեկավարի տեղակալներ Սերգե Մկրտչյանը, Գուրգեն Թադևոսյանը, համայնքապետարանի ղեկավար կազմի անդամներ և աշխատակիցներ։ Ներկաները մեկ րոպե լռությամբ հարգեցին 2022թ․-ի սեպտեմբերի 13-14-ին պատերազմական գործողությունների ընթացքում անմահացած քաջերի հիշատակը։

Խորհրդակցության շրջանակներում լայն քննարկումներ ծավալվեցին հավաքագրումների՝ այդ թվում, գույքահարկի և հողի հարկի վերաբերյալ, համայնքի ղեկավարը անդրադարձավ հարկերի հավաքագրումը պատշաճ կազմակերպելու կարևորության և անհրաժեշտության հարցին։

Քննարկվեցին ներկայում ընթացող և առաջիկա սուբվենցիոն ծրագրերը, անդրադարձ կատարվեց բնակավայրերում ընթացիկ աշխատանքներին, համայնքային այցերի ընթացքում նկատված խնդիրներին։ Քննարկվեց և կարևորվեց բնակավայրերի կյանքին վերաբերող աշխատանքային, մշակութային, կոմունալ, ֆինանսական, գյուղատնտեսական և տարաբնույթ այլ հարցեր։

Ելույթներով, հայտարարություններով և աշխատանքային հարցերով հանդես եկան համայնքապետարանի ոլորտային պատասխանատուներ, ներկայացնելով պետական և համայնքային ծրագրեր, որոնք առաջիկայում կյանքի կկոչվեն։ Այս առումով առաջիկայում նախատեսված ծրագրերից է հայրենիքի նվիրյալ Միհրան Ասատրյանին նվիրված մինիֆուտբոլի մրցաշարը, որի մասին ավելի ուշ կլինեն հայտարարություններ։

Քննարկումներ եղան նաև գյուղատնտեսական պետական ծրագրերի, աշնանացանի և այլնի մասին, կարևորվեց նաև համայնքի ՀՈԱԿ-ների, մասնավորապես մանկապարտեզների հետ կապված հարցերը, որոնց շուրջ նույնպես եղան հայտարարություններ։

Խորհրդակցության ընթացքում հարց ու պատասխանի ժամանակ վարչական ղեկավարները հանդես եկան տարատեսակ հարցերով և առաջարկություններով, որոնք տեղում քննարկվեցին և պարզաբանվեցին։

Բնակավայրերում աշխատանքային գործունեությունը համակարգված և արդյունավետ իրականացնելու համար համայնքի ղեկավարը տվեց հանձնարարականներ և հորդորեց վարչական ղեկավարներին՝ լինել առավել ուշադիր բնակավայրերում առկա խնդիրների նկատմամբ և անել առավելագույնը ՝դրանց շուտափույթ լուծման նպատակով։