Ա Ր Ձ Ա Ն Ա Գ Ր ՈՒ Թ Յ ՈՒ Ն

15.10.2024թ. ՀՀ Արագածոտնի մարզի Թալին համայնքի

Պարտիզակ բնակավայրում տեղի ունեցած հանրային քննարկման

Պարտիզակ բնակավայր

ՕՐԱԿԱՐԳՈՒՄ՝  «Կ.Վարդանյան» ՍՊ ընկերության կողմից ներկայացված ՀՀ Արագածոտնի մարզի Լուկաշինի տուֆերի հանքավայրում իրականացվելիք օգտակար հանածոյի արդյունահանման աշխատանքների ծրագրի և շրջակա միջավայրի վրա ազդեցության գնահատման հաշվետվության քննարկում:

ՆԵՐԿԱ ԷԻՆ՝ Պարտիզակ բնակավայրի վարչական ղեկավար Ա. Պետրոսյանը, Թալին համայնքի գյուղատնտեսության և բնապահպանության բաժնի պետ Գ. Միրզախանյանը, ծրագրի հեղինակ և կատարողներ Շ. Խաչատրյանը, Ա. Անտոնյանը, «Կ.Վարդանյան» ՍՊ Ընկերության ներկայա­ցուցիչներն ու համայնքի բնակիչներ (ներկաների ցուցակը կցված է)

ԵԼՈՒՅԹ ՈՒՆԵՑԱՆ՝ բացման խոսքով հանդես եկավ Թալին համայնքի գյուղատնտեսության և բնապահպանության բաժնի պետ Գ. Միրզախանյանը: Նա ներկայացրեց հանրային քննարկման օրակարգը և ներկաներին հորդորեց ցուցաբերել ակտիվություն և բարձրաձայնել իրենց հուզող հարցերը, ապա դիմեց ընկերության ներկայացուցիչներին ներկայացնելու իրականացվելիք ծրագիրը:

Ծրագիրը ներկայացնելու համար խոսքը փոխանցվեց ծրագրի համահեղինակ և կատարող  Շ. Խաչատրյանին:

Շ. Խաչատրյանը ողջունեց ներկաներին և ամփոփ ներկայացրեց ծրագրի հիմնական դրույթները: Նա նշեց, որ ընկերությունը ցանկանում է բնակավայրի վարչական սահմաններում գտնվող Լուկաշինի տուֆի հանքավայրի հաստատված պաշարներից տուֆի արդյունահանման թույլտվություն ստանա: Հայցվող տեղամասը գտնվում է Պարտիզակ բնակավայրից 5-5,5կմ հեռավորության վրա Լուկաշին բնակավայրի շրջանում: Հայցվող մակերեսը կազմում է 4,9 հա: Այս մակերեսի վրա տուֆի պաշարների քանակը կազմում է 660000 մ³, որը նախատեսվում է արդյունահանել 20 տարիների ընթացքում: Տարեկան նախատեսվում է արդյունահանել 33 հազ. մ³ տուֆ:

Աշխատանքների ընթացքում գոյանալու է 20 հազ.մ³ մակաբացման ապար, որը հետագայում կօգտագործվի ռելիեֆի վերականգնման համար:

Նախագծային փաթեթը ընթացքի մեջ է, կավարտենք և մուտք կանեն ՀՀ տարածքային կառավարման և ենթակառուցվածքների նախարարություն, մեկ օրինակ կտրամադրվի նաև համայնքին: Եթե կլինեն դիտողություններ և առաջարկներ դրանք կներառվեն փաթեթում: Ինչը հնարավորություն կտա ունենալու բոլորիս համար ընդունելի նախագծային փաթեթ:

Գ. Միրզախանյանը դիմեց բնակիչներին և վարչական ղեկավարին – կա՞ն արդյոք վարելահողեր հայցվող տարածքում:

Ա. Պետրոսյանն ու բնակիչները պատասխանեցին՝ - ոչ:

Բնակիչներիը նշեցին, որ այդ շրջանում վաղուց արդյունահանում է իրականացվում, հողերն անօգտագործելի են:

Ա. Անտոնյանը նշեց, որ անցյալ դարի 70-ական թվականներից այդ տարածքներում երկրաբանական աշխատանքներ են կատարվում, շրջակայքում բացված շատ հանքեր կան ու հողերը գյուղատնտեսության համար անօգտագործելի են:

Բնակիչները մտահոգություն հայտնեցին այն մասին, որ ոչ մի ընկերություն ռելիեֆի վերականգնում չի իրականացրել, ամբողջ տարածքում առկա են փոսեր:

Շ. Խաչատրյանը նշեց, որ մտահոգությունը տեղին է, շատ կարևոր խնդիր է, նա նշեց, որ այս վիճակի պատասխանատուները նաև բնակիչներն են, որ չեն պահանջել:

Բնակիչները նշեցին, որ պահանջել են սակայն, պատասխան են ստացել, որ ընկերությունները գումար են մուծում վերականգնման համար, բայց կառավարությունը դա չի անում:

Շ. Խաչատրյանը նշեց, որ դրանք հավանաբար շատ վաղուցվա են, այժմ օրենսդրությունը շատ խստացել է: Երբ մենք փաթեթը ներկայացնենք դուք այնտեղ կտեսնեք, որ այդ գործունեության համար կոնկրետ հաշվարկներ և գումար կա նախատեսված: Եթե այդ աշխատանքները ընկերությունը չի անում ապա պետությունն է անում դրամագլխի գումարներով:

Գ.Միրզախանյանը նշեց, որ խորհրդային ժամանակներում չգիտի ինչպես է դա արվել, բայց այժմ կա օրենք, որի համաձայն ընկերությունները վճարում են դրամագլուխ: Հանքավայրը շահագործելուց հետո կուտակված գումարով կատարվում է ռեկուլտիվացում. Կա՛մ ընկերությունն է անում գումարը հետ ստանում կա՛մ կառավարությունն է անում: Մրցույթ է հայտարարվում և տենդեռ շահող ընկերությունը կատարում է ռեկուլտիվացում:

Բնակիչներից մեկը նշեց, որ այդ փոսերը միայն խորհրդային ժամանակներինը չեն, հանքերը հինգ տարի առաջ փակվել են բայց փոսերը մնացել են:

Գ. Միրզախանյանը պատասխանեց – եթե ընկերությանը տրամադրված է լիցենզիա, օրինակ՝ մինչև 30 թվականը, բայց երկու տարի չի աշխատել, օրենքը իրեն չի պարտավորեցնում, որ կատարի հարթեցում: Լիցենզիան դեռ գործում է, 1 տարի հետո կարող է նորից աշխատել: Լիցենզիայի ժամկետը երբ լրացավ, ինքը պարտավոր է դա անի:

Բնակիչները նորից անհանգստացան թե դրա պատճառով շատ արոտավայր է շարքից դուրս եկել: Խնդիրը կայանում է նաև նրանում, որ հանքերը մեկից փոխանցվել են մյուսին, գնացոը թողելա քանդած, եկողն էլ ոչինչ չի արել և այսպես շարունակ: Հիմա ո՞վ է դրա պատասխանատուն:

Բնակավայրի վարչական ղեկավար Ա. Պետրոսյանը դիմեց ներկաներին ասելով, որ այս ընկերության ներկայացուցիչները խոստանում են, որ ամեն բան կարվի: Այս պահին քննարկում ենք այս՛ ընկերության անելիքները, դրանք այս ընկերության հետ կապ չունեն, խորհրդային ժամանակների հարցեր են:

Գ. Միրզախանյան – իսկապես հարցը մտահոգիչ է: Մենք ուզում ենք մեր հնարավորությունների սահմաններում հարցին լուծում տալ: Չենք կարող ասել վաղվանից անում ենք:

Բնակիչները նշեցին, որ եթե այդ տարածքները բարեկարգվեն տարածքը կդառնա օգտագործելի և ինչ որ գործունեություն կարելի կլինի իրականացնել:

Գ. Միրզախանյանը հորդորեց բացասական էմոցիաներին տուրք չտալ և չմեղադրել ոչ մեկի: Նա դիմեց ներկաներին, -  եթե այլ հարցեր չկան ցանկանում եմ ներկայացնել համայնքի և համայնքի ղեկավարի դիրքորոշումը:

Մենք որդեգրել ենք մի քաղաքականություն՝ ովքեր ուզում են համայնքում կամ համայնքի որևէ բնակավայրում բիզնես իրականացնել, պետք է համայնքի զարգացման համար  5-7 մլն ՀՀ դրամի ներդրում անել: Սա առաջարկվում է բոլոր այն ընկերություններին ովքեր ուզում են բիզնես իրականացնել: Վարչական ղեկավարը կարող է առաջարկել ծրագիրը, համայնքի ղեկավարի և Ընկերության հետ կքննարկենք ու ընթացք կտանք: Բնակիչները պետք է զգան, որ տնտեսությունը զարգանում է, ընկերության գործունեությունից համայնքը պետք է շահի, որպիսզի մարդիկ չուզենան համայնքից հեռանան:

Ընկերությունը թող  աշխատի, շահույթ ստանա, աշխատատեղ ստեղծի: Մենք կանգնում ենք գործածարի կողքին, ինքը թող շահույթ ստանա և ներդրում անի: Բացի իր ընդերքօգտագործման պայմանագրում նախատեսված գումարից ինքը կամավոր իր բիզնեսի շահույթից գումար է ներդնում բնակավայրի շենացման համար: Սա է մեր առաջարկությունը, կարծում եմ՝ բոլորդ կողջունեք: Ընկերությանը մաղթում ենք բարի երթ:

Բնակիչները ողջունեցին ծրագիրը և հաջողություն մաղթեցին ծրագրի ընթացքին:

ՈՐՈՇԵՑԻՆ – հնարավորություն տալ «Կ. Վարդանյան»  ՍՊ ընկերությանը իրականացնելու նախատեսված ծրագիրը պահպանելով ՀՀ օրենսդրության պահանջները:

Թալին համայնքի գյուղատնտեսության և

բնապահպանության բաժնի պետ՝                                               Գ. Միրզա­խան­յան

Պարտիզակ բնակավայրի վարչական ղեկավար՝                     Ա. Պետրոսյան

 «Կ. Վարդանյան» ՍՊԸ տնօրեն՝                                                   Հ․ Հովհաննիսյան

 «ԷԼ ԷՆ ԴԻ» ՍՊԸ տնօրեն՝                                                           Ա. Անտոնյան  

 Հանրային լսման արձանագրող՝                                                  Ա. Գրիգորյան